اتصالات ولا حاسبات؟؟؟؟؟

طلابى الأعزاء

كتير جدا بيجيلى السؤال ده منكم سواء من سنة تانية غالبا أو من سنة أولى أحيانا، والحقيقة باتبسط إن ده سؤال محير بالنسبة ليكم لأن ده دليل على إنكم بتدوا القرار ده حقه. يعنى فى ناس كانوا بيختاروا على أساس أنهى قسم بياخد مجموع أكبر، وفى ناس بيختاروا على أساس أصحابهم هيدخلوا قسم ايه.معنى إن فى حيرة إنكم بتحاولوا توزنوا الأمور صح.

المشكلة إن فى ناس بتعتقد إن فى قسم أحسن من قسم بشكل مطلق، زى ما كنا فى الثانوية العامة برضه فى ناس بتعتقد إن فى كلية أحسن من كلية بشكل مطلق.الحقيقة إن الأحسن ده تبعا للظروف العامة فى البلد وفى الكلية وظروف الشخص نفسه.يعنى مثلا فى وقت من الأوقات كانت كلية حقوق كلية قمة دلوقت بقت كلية اللى مش لاقى غيرها. برضه فى وقت من الأوقات كان مجموع كلية تربية عالى جدا وفجأة مع إلغاء تكليف المدرسين مجموعها نزل كتير قوى. بالرغم إن فى الحالتين طبيعة الدراسة نفسها ماتغيرتش.

لو رجعنا  للاختيار المحدود بين اتصالات و حاسبات عندنا فى الكلية فلو أنا شخصيا كنت فى الموقف ده ففى عوامل كتير هاخدها فى حسبانى، وهأحاول أقولها هنا بترتيب أهميتها من وجهة نظرى:

1- أنهى قسم باستمتع بدراسته أكتر. وده ممكن أقدره من المواد اللى ياخدها فى أولى وتانية. يعنى مثلا أنا عمرى ما استوعبت بالشكل الكافى فكرة الفولت اللى سابق التيار ب 90 درجة – أو العكس مش فاكرة – اه كنت باذاكر وأجيب فى المواد دى جيد جدا – أوائل طلبة بقى :)- بس عمرى ما قدرت أفهمها تماما والدليل إنى مش فاكرة دلوقت مين سابق مين.على العكس مثلا من مواد البرمجة أو الدوائر المنطقية أو تنظيم الحاسبات، حتى لو مكنتش فاكرة بعض الحاجات دلوقت إلا إنى بيتهيألى أحيانا إنى بأحسها مش بأفهمها.يعنى لما كنت باخد برمجة فى سنة أولى كنت بالاقى زمايلى كتير مش فاهمين وشايفين إنها معضلة المعضلات، وأنا ساعتها مكنتش فاهمة هما ليه كده لأنى مكنتش بأبذل مجهود فى فهمها أصلا، وده مش عبقرية منى ولكن لأن كل ميسر لما خلق له. فى المقابل كنت بالاقى زمايلى فى سنة تانية مستمتعين قوى بمادة اسمها آلات وقوى كهربية وبيحسسونى إنها فن راقى بينما أنا كنت بأعانى منها أشد العناء.فالقصة فى النهاية أنا بأستمتع بايه لأن ده غالبا اللى أنا هانجح فيه بشكل أسهل.

ملحوظة : حاسبات لا تساوى برمجة. البرمجة بالنسبة لقسم حاسبات هى الأداة، تقدر تقول عدة النجار، يعنى فى ناس زمايلى مكانوش بارعين فى البرمجة لكنهم نجحوا فى حاسبات إلى حد كبير، والعكس. هى بس مؤشر.

2- أنا أكثر تميزا فى ايه؟ وده يختلف عن اللى فات. يعنى أنا كنت بأستمتع بعمل الدوائر الكهربية وبدراسة الإلكترونيات – يمكن عشان قريبة من حاسبات – لكن لما قارنت نفسى باللى حواليه فى الإلكترونيات وفى البرمجة لقيتنى أكثر تميزا فى البرمجة، يبقى ده ممكن يكون مؤشر إنى هابقى برضه متميزة على المدى البعيد.

3- إيه مجالات الشغل المتاحة بعد كده للتخصص ده؟ وهل المجالات دى موجودة فى مصر؟ وإيه مدى توفرها؟ وإيه طبيعة الشغل نفسها؟ وهل تناسبنى ولا لأ؟ وإيه مستوى المرتبات؟ ومين الناس اللى هاتعامل معاهم فى الشغل ده، يعنى هاتعامل مع عملاء ولا مع مهندسين ولا مع عمال وصنايعية ولا مع دكاترة جامعة ولا مع طلبة؟ وهل طبيعة الشغل دى تناسبنى كبنت، يعنى مثلا هل فى ورديات أو تأخير أو شغل فى مواقع عمل؟ وهل أصلا أصحاب الأعمال بيقبلوا بنات فى التخصص ده ولا لأ؟ مين المنافسين بتوعى؟

كل الأسئلة دى – وكل ما يتعلق بسوق العمل عموما – محتاج أعرفه قبل مأ أختار على قد ما أقدر. أعرفه منين بقى؟ من ناس شغالين بالفعل فى كلا التخصيين. طيب أجيب الناس دول منين؟ ممكن حد قريبنا وممكن حد معرفة وممكن أدخل على المنتديات والمجموعات البريدية الهندسية مثلا وأسأل وممكن أتابع إعلانات الشغل فى الجرايد وعلى النت وممكن أحضر مؤتمرات ومعارض توظيف. الخلاصة المعلومات كلها متاحة بس اللى بيدور بجد مش اللى بيسمع كلميتن من شخص واحد معرفة وياخدهم أمر مسلم بيه.

4- ايه مكان التخصص ده فى العالم دلوقت – فى العالم مش بس فى بلدى. يعنى هل بقى خلاص مجال قتل بحثا ولا العالم كله دلوقت بيتكلم عنه ولا هو التخصص اللى جاى فى المستقبل. لأن ممكن تجيلى فرصة للسفر بره. يعنى زى ما بيقولوا علم الميكانيكا كان هو المسيطر فى وقت من الأوقات وبعدين جت الكهربأء وبعدين الكمبيوتر ودلوقت فى حاجة اسمها النانو التكنولوجى شاغلة كل الناس. مش عارفة إذا كتير ع الناس فى أولى وفى تانية يتابعوا حاجة زى كده بس فى رأبى إن الوعى بالتغيرات اللى بتحصل فى العالم دى ممكن يفرق كتير بين شخص والتانى.

5-  إيه طبيعة الدراسة نفسها فى القسم فى الكلية بتاعتى؟ من حيث كل حاجة بقى. من حيث المواد والدكاترة وإمكانيات القسم وتكاليف الدراسة وكل حاجة.

دول تقريبا العوامل الأساسية فى نظرى. ممكن كمان أى حد يكون عنده عوامل إضافية تهمه. فى رأيى أهم اتنين هما رقم واحد واتنين ويمكن هما اللى بيحسموا الاختيار فى نظرى. لأنى شايفة إن أى حد متميز أكيد فرصته هتلاقيه بسهولة – أيوه هى اللى هتلاقيه غالبا- مهما كانت ظروف سوق العمل. طبعا عشان يكون الإنسان متميز لازم يكون بيحب اللى بيعمله أولا وبيجتهد فيه بما يكفى ثانيا. يمكن يكون حد تانى – الولاد غالبا – العامل الأساسى عندهم هو سوق الشغل لأن ده اللى يفرق معاهم فى الأول وفى الآخر. كمان ظروف القسم مش هتخلينى أدخل تخصص مباحبوش أو أسيب تخصص بأحبه لأن فى الآخر الدراسة بتوجهنى بس مش هى اللى بتعملنى. المفروض إنى أنا اللى أبنى نفسى.

كمان ممكن يكون لوجهة نظر الناس اللى حواليا اللى بأثق فى رأيهم أهمية كبيرة. يعنى م إسلام قالنا مرة إن فى حد قالله إنت هتبقى ممتاز فى الرياضيات وعلى هذا الأساس قرر يدخل هندسة. أحيانا بعض الناس بيكونوا شايفين فينا حاجات إحنا مش شايفنها.

آخر حاجة بقى:

عشان أختار اتصالات ولا حاسبات يبقى أجيب ورقتين ورقة أسميها اتصالات وورقة أسميها حاسبات، وكل ورقة أقسمها نصين نص للمميزات ونص للعيوب، وكل ميزة أو كل عيب هيبقى ليها وزن على حسب أهميتها بالنسبة ليا. وطول ما أنا بأجمع معلومات أسجل فى الورقتين. لما تيجى بقى لحظة الاختيار هتكون الصورة بقت أوضح عندى لحد كبير. وتقريبا بقى عندى اختيار مرجح. أصلى صلاة استخارة واتوكل على الله.

فى مرة تانية بقى هأتكلم عن قسم حاسبات تحديدا بصفتى متخرجة منه وبأدرس فيه.

أتمنى أكون أفدت.

Advertisements

9 تعليقات

  1. مارس 31, 2009 في 2:14 ص

    >> لأنى شايفة إن أى حد متميز أكيد فرصته هتلاقيه بسهولة.

    يااه أكثر جملة عجبتنى. فعلا أهم حاجة في إختيارى كانت الإستمتاع بالدراسة والتميز فيها. لو الواحد عند طموح معين في النجاح في مجال معين حاسس إنه متميز فيه يبقى هو ده المجال اللى حيعرف يحس فيه بالمتعة في الدراسة و في الشغل.

    على فكرة الموضوع دة خلني أفكر إذا كنت دخلت Computer Science لسبب وجيه فعلا. وأنا في ثانوي كنت عايز أدخل حقوق أو رياضة بحتة أو علم نفس أصلا 🙂 و الموضوع لسه في دماغى إلى حد ما :). أنا بس دخلت Computer Science علشان ده الحاجة اللي أنا كنت بحبها و كنت ضامن إلى حد ما اني حتعلمها كويس. إنما دة مش معناه إن حبي للمجالات التانية كان أقل. ماعرفش فعلاً بس ممكن بعد ما استقر في أي شغل و حياتي تاخد مجرى طبيعي أعيد تقييم الموقف وادرس حاجة تاني. هو يعني اه أنا بعدت إلى حد ما من فكرة علم النفس 🙂 بس لسة نفسي ادرس حاجة لها علاقة بالقانون.

    شكرا على الموضوع.

  2. yasmeen said said,

    مارس 31, 2009 في 9:12 ص

    مروة بجد ايلى انتى قولتيه ده صح ميه فى الميه انا بس هقول حاجة انا اهو متخرجة من اتصالات بس ملقيتش شغل و اخد كورس اوركل و بشتغل مبرمجة يعنى ممكن حتى لو درستى حاجة و حابة تغيرى مجاليك بعد كدا مش هيحصل حاجة بس طبعا اهم حاجة من وجهة نظرى انتى انهى قسم هينسبك فى الدراسة اكتر من انى افكر انهى قسم هو ايلى هشتغل بيه لانو فى الاخر الشغل ده نصيب يعنى انا شخصيا كنت بحب مواد الالكترونيات و الاتصالات اكتر بكتير من مواد البرمجة فده خالانى اختار اتصالات بس لما ملقيتش شغل خااااااااااالص لخريجى اتصالات انا مش بعقد حد بس احنا لما اتخرجنا متهيقلى كل شركات الاتصالات مش محتاجة حد و مكتفيه بايلى فيها بس ممكن لما ايلى فى اولى السنة ديه او تانية يتخرجو تكون شركة اتصالات فتحت جديدة و تطلب عدد كبير كل شى فى علم الغيب بس انا قبل مادخل اتصالات كانو كل الناس بيقولولى ادخلى اتصالات علشان مطلوبة جدا فى سوق العمل بس لما خلصت ملقيتش حد خالص عايز اتصالات و حتى ايلى عايزين عايزين ولاد بس انا اسفة انى طولت بس انا بحكى ايلى حصلى علشان لو حد عايز يعرف الدنيا برة ماشة ازاى لو بيفكرو على موضوع الشغل فده مش مقياس ايلى مطلوب النهاردة ممكن كمان سنة ميكونش مطلوب و العكس اهم حاجة تدرس حاجة تكون بتحبها و تمشى فيها و تتفوق كمان اما الشغل فده نصيب و انا عن نفسى رغم انى ماشتغلتش باتصالات بس لو رجعت الكلية تانى كنت باردو هدخل اتصالات انا كنت بحب كل مواد اتصالات و شيفاه قسم دراسته ممتعة رغم انى دلوقتى شغالة مبرمجة اوركل…يا رب وفق الجميع يا رب

  3. الطائر التركي said,

    أبريل 6, 2009 في 2:54 ص

    ازيكم يابشمهندسين شبرا
    أتصالات ولا حاسبات؟!
    سؤال قديم جديد، سؤال الوحيد اللي هيجوبه أنتا/أنتي!، سؤال انتا جاوبة عليه كتييييير في حياتك، سؤال محتاج من اللي هيجوبه شوية مهارات اللي المفروض انها تكون مع اللي في سنك، والكلام في النقطة ده هيطول فاكان في اقتراح اني اتكلم عن تجربتي بما اني احد خريجي حاسبات وصدوقني هدفي انكم تأخذه قراركم بشكل صحيح
    في البداية
    تعليمي الثانوي كان ثانوي فني في قسم أسمه أصلاح وصيانة المعدات الكهربية –يعني بور–، وبعد كده جامعة عمالية –معهد 4 سنوات– قسم كهرباء وهنا قعدة سنتين ادرس مواد اللي فكرة الان منهم هندسة كهربية والات كهربية نظم نقل وتوزيع وأجهزة كهربية –مواد اساسية في قوى– والالكترونات واخري –مواد اساسية في اتصالات– ويمكن الحاسبات كانت مظلمة في الموضوع اللي افتكرة اني الشئ الوحيد اللي دراسته ليها هو المنطق وكان نصف مادة أسمها تطبيقات الالكترونية ده خلاف المواد العامة والخاص بلعمالية المهم روحت الهندسة
    مرحلة الهندسة
    لما تدخلة هندسة مكنش في دمغي اني افكر وفاضل بين الاقسام يمكن عشان في وجهة نظر بتقول اكمل نفس الطريق اللي تواجد فيه –وهو خمس سنوات اغلبهم بور– بس كان دائما جوايه حب غير عادي للرياضيات –وخصوصا بعض فرعها اللي مفهاش قوانين كتيره– وكنت حاسس ان الرياضه مش هي النهاية وانا في شئ بيقوم عليها وهو ده اللي كنت بدور عليه، والغريبه ان الجبر البوليني انضم في القائمة مع الرياضه
    أعدادي
    هنا وجدت ما كنت ابحث عنه في مادة الكمبيوتر شئ اسمه برمجة ومن سعتها وانا معها ليل ونهار وبرغم اختلافي مع بعض اللي حوليه علي قرار تحويلي اللي كان بعض الناس شيفه انه شئ مستحيل او غير منطقي وانهالت عليه وجهات نظر ومبررات كتيييره واحتمال يوجد بعضها هنا بس للأسف معظمها غريبة جدا! او علي الاقل غير منطقية من وجهة نظري
    كفاية كده وجعت دمغكم واحتمال يكون في تكمله
    سلامي لمهندسين شبرا

  4. شيماء ابراهيم said,

    مايو 17, 2010 في 4:49 م

    بجد يا مروة دايما سباقة بالحاجات الحلوة اللي تخدم الطلبة ونفسي نعمل م}تمر مشترك بيننا وبين معيدين اتصالات نوعي فيه الطلبة اكتر بكل قسم ودراسته وان الموضوع مش بس الكترونيات وبرمجة بس في مواد تانية شيقة في كل قسم
    بس ليا تعليق واحد علي موضوع الشغل سوق العمل بيتغير من سنة للتانية وكمان توفيق ربنا له اكبر عامل في الموضوع ده وفي ناس خريجي نفس الدفعة بيشتغلوا وناس لأ
    في رأيي المعيار الأهم هو انا شايف نفسي في ايه وبستمتع بدراسة وهنا هأحكي تجربتي الشخصية :
    طول عمري نفسي يبقي عندي كمبيوتر وده لم يكن متاح في المرحلة الثانوية بس درست في اولي ثانوي قشور القشور وكنت مبسوطة وتوقف الموضوع عند كدة
    وفي ثانية ثانوي وكنا أول سنة يطبق علينا موضوع السنتين ثانوية عامة اصريت علي علمي رياضة بالرغم من المعارضات اللي قابلتها وده طبعا علشان عشقي للرياضيات اللي ورثته عن أبي رحمه الله
    والحمد لله تفوقت ودخلت هندسة وبعد اعدادي قررت التحويل لأني نفسي أدخل هندسة كمبيوتر ولم يكن هناك قسم في شبرا في ذلك الوقت وبالفعل حولت وقبلت في جامعة القاهرة بس رفضوا دخولي حاسبات بحجة اني لازم اكون جابية امتياز ولغيت التحويل
    وفي سنة اولي لم اكن احب الإلكترنيات وكنت زي كتير مننا في قسم حاسبات بعشق البرمجة علي الرغم من انه لم يكن عندي جهاز كمبيوتر ولا كان في معامل في الكلية وكنت زعلانة قوي اني في الأخر هدرس اتصالات
    وفجأة في سنة تانية يعلنوا عن افتتاح قسم حاسبات وحسيت ساعتها ان ربنا بيحبني وقدمنا في القسم 8 طلبة فقط واتهرينا تريقة من دكاترةو ومعيدين وبعد ماالسنة بدأت ظهرت اشاعات ان القسم هيتلغي علشان الطلبة عددهم قليل وبرضوا اصرينا نكمل
    كملنا لأننا كنا لاقيين نفسنا فيه ولم نفكر في هنشتغل بيه ولا لأ
    والحمد لله ربنا كملهالي علي خير ولسة برضوا بستمتع بالبرمجة وبستمتع بتدريسها
    وعلي فكرة كتير من دفعتي اتصالات وحاسبات اشتغلوا برة كويس يعني مفيش قسم بيشتغل كله وقسم بيقعد كله

  5. Doaa tantawy said,

    أغسطس 16, 2010 في 11:06 ص

    يا جماعة سؤال غبى منى معلش
    ياعنى دلوقتى فى هندسة قسم كهربا
    هاندرس اتصالات وباور مع بعض
    ولا انا بختار ما بين الأتنين اول ما بدخل
    ولا بندرسهم مع بعض واول ما بشتغل بقرر اشتغل بأنهو

    علماً بأنى لسة ما دخلتش كلية هندسة بس ادعولى ربنا يوفقنى وادخلها
    ومحتاجة ردكم عليا ضروووووووورى

  6. marwayusuf said,

    أغسطس 19, 2010 في 6:00 م

    بصى كل كلية وليها نظام مختلف فى تقسيم الأقسام بتاعها
    لو هنتكلم عن هندسة شبرا فالتقسيم فيها حاليا كالتالى
    أول سنة وهى إعدادى بتبقى الدراسة فيها عامة مش تخصص معين
    بعد إعدادى بيبقى فى أقسام
    عمارة
    مدنى
    مساحة
    ميكانيكا
    كهرباء اتصالات وحاسبات
    كهرباء قوى
    بعد سنة ثانية بيحصل تقسيم تانى جوه الأقسام كالتالى
    مدنى بتتقسم لمدنى إنشاءات ومدنى أشغال
    ميكانيكا بتتقسم لميكانيكا إنتاج وميكانيا قوى
    كهرباء اتصالات وحاسبات بتتقسم لشعة اتصالات وشعبة حاسبات
    وربنا يوفقك وتدخلى هندسة إن شاء الله

  7. MEna said,

    يونيو 16, 2011 في 11:46 م

    طيب واللى بيحب الشعبتين و شغوف بتعلم اللى فيهم هما الاتنين 😀
    يعمل اية؟

  8. يونيو 24, 2011 في 4:57 م

    مينفش اكون طماع حبتين وادخل اتصالات واخد كورسات حاسبات بره لان بصراحه انا شايف اني اقدر امشي في الاتنين اوبمعني اخر (اني عاوز المهم علشان تكون فرصي اكبر من غيري وبعد كده ابقي اقدر احدد هكون ادق في اختيار ايه لان في ناس دخلت حاسبات وشغاله شبه انها اتخرجت من اتصالات والعكس كذلك)

  9. marwayusuf said,

    يونيو 25, 2011 في 12:51 ص

    مهندس مينا
    حياتك كلها عبارة عن مجموعة اختيارات
    ومحدش بياخد كل حاجة
    فى الآخر عليك إنك تختار
    لكن فى حاجة قريبة للى انت بتقوله إنك تشتغل فى مجال مرتبط بالتخصصين
    يعنى مثلا فى بعض الحاجات فى اتصالات – ويمكن فى قوى كمان – بتحتاج برمجة
    زى مثلا برمجة الميكروكنترولر
    الشبكات مثلا ليها مدخلين مدخل من اتصالات ومدخل من حاسبات
    بس فى النهاية هتحتاج تقرر قاعدتك جاية منين من اتصالات ولا من حاسبات
    وبعد ما تتخرج لو معرفتش تكمل أو محبتش تكمل فى المجال المشترك ده هيبقى تانى اختيار ليك فى اتصالات ولا فى حاسبات؟

    ابراهيم أحمد
    بص دى وجهة نظر كتير مقتنعين بيها وتحترم منهم طبعا
    بس أنا شخصيا مش مقتنعة بيها إطلاقا
    وبأحس إن اللى بيعملها بيفكر بمنطق الممكن مش المطلوب
    بمعنى أنا بأدور على أى فرصة شغل ممكنة
    مش بأدور على فرصة شغل أنا عاوزها تحديدا
    وصدقنى اللى بيبقى عاوز حاجة تحديدا وبيشتغل عشانها بجد بيلاقيها
    واللى عاوز الممكن بيلاقى اى حاجة ممكنة وعليه إنه يقبلها
    بس حتى مع سياسة الممكن دى برضه ففى مشكلة
    لو أنا صاحب شركة خاصة عاوز مهندس حاسبات هل هأقول عاوز واحد واخد كورسات كذا وكذا ولا أقول شرط رقم واحد خريج حاسبات؟
    طب لو عاوز مهندس اتصالات، هأفضل أنهى واحد بعد ما اتخرج اخد كورسات اتصالات ولا واحد اخد كورسات حاسبات؟
    الحركة دى ببساطة معناها إنك بنيت دور فى حاسبات ودور فى اتصالات
    فى الوقت اللى فيه غيرك بنى دورين فى تخصص واحد بس
    بالنسبة لحاسبات تحديدا فى حاجات بتدرسها فى الكلية مش هتلاقيها فى كورسات بره
    وهى دى اللى بتفرق بين مهندس حاسبات وبين فنى حاسبات – زى ما بأحب أسميها –
    ده ميمنعش إن ممكن واحد متخرج من حتى مساحة يدرس بنفسه كل اللى فاته فى التخصص ويبنى علمه بنفسه
    بس ده بياخد وقت ومجهود طويل وبيعمل كده اللى فاتته فرصة إنه يدخل حاسبات من البداية فبيصحح مسار


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: