اتصالات ولا حاسبات؟؟؟؟؟

طلابى الأعزاء

كتير جدا بيجيلى السؤال ده منكم سواء من سنة تانية غالبا أو من سنة أولى أحيانا، والحقيقة باتبسط إن ده سؤال محير بالنسبة ليكم لأن ده دليل على إنكم بتدوا القرار ده حقه. يعنى فى ناس كانوا بيختاروا على أساس أنهى قسم بياخد مجموع أكبر، وفى ناس بيختاروا على أساس أصحابهم هيدخلوا قسم ايه.معنى إن فى حيرة إنكم بتحاولوا توزنوا الأمور صح.

المشكلة إن فى ناس بتعتقد إن فى قسم أحسن من قسم بشكل مطلق، زى ما كنا فى الثانوية العامة برضه فى ناس بتعتقد إن فى كلية أحسن من كلية بشكل مطلق.الحقيقة إن الأحسن ده تبعا للظروف العامة فى البلد وفى الكلية وظروف الشخص نفسه.يعنى مثلا فى وقت من الأوقات كانت كلية حقوق كلية قمة دلوقت بقت كلية اللى مش لاقى غيرها. برضه فى وقت من الأوقات كان مجموع كلية تربية عالى جدا وفجأة مع إلغاء تكليف المدرسين مجموعها نزل كتير قوى. بالرغم إن فى الحالتين طبيعة الدراسة نفسها ماتغيرتش.

لو رجعنا  للاختيار المحدود بين اتصالات و حاسبات عندنا فى الكلية فلو أنا شخصيا كنت فى الموقف ده ففى عوامل كتير هاخدها فى حسبانى، وهأحاول أقولها هنا بترتيب أهميتها من وجهة نظرى:

1- أنهى قسم باستمتع بدراسته أكتر. وده ممكن أقدره من المواد اللى ياخدها فى أولى وتانية. يعنى مثلا أنا عمرى ما استوعبت بالشكل الكافى فكرة الفولت اللى سابق التيار ب 90 درجة – أو العكس مش فاكرة – اه كنت باذاكر وأجيب فى المواد دى جيد جدا – أوائل طلبة بقى :)- بس عمرى ما قدرت أفهمها تماما والدليل إنى مش فاكرة دلوقت مين سابق مين.على العكس مثلا من مواد البرمجة أو الدوائر المنطقية أو تنظيم الحاسبات، حتى لو مكنتش فاكرة بعض الحاجات دلوقت إلا إنى بيتهيألى أحيانا إنى بأحسها مش بأفهمها.يعنى لما كنت باخد برمجة فى سنة أولى كنت بالاقى زمايلى كتير مش فاهمين وشايفين إنها معضلة المعضلات، وأنا ساعتها مكنتش فاهمة هما ليه كده لأنى مكنتش بأبذل مجهود فى فهمها أصلا، وده مش عبقرية منى ولكن لأن كل ميسر لما خلق له. فى المقابل كنت بالاقى زمايلى فى سنة تانية مستمتعين قوى بمادة اسمها آلات وقوى كهربية وبيحسسونى إنها فن راقى بينما أنا كنت بأعانى منها أشد العناء.فالقصة فى النهاية أنا بأستمتع بايه لأن ده غالبا اللى أنا هانجح فيه بشكل أسهل.

ملحوظة : حاسبات لا تساوى برمجة. البرمجة بالنسبة لقسم حاسبات هى الأداة، تقدر تقول عدة النجار، يعنى فى ناس زمايلى مكانوش بارعين فى البرمجة لكنهم نجحوا فى حاسبات إلى حد كبير، والعكس. هى بس مؤشر.

2- أنا أكثر تميزا فى ايه؟ وده يختلف عن اللى فات. يعنى أنا كنت بأستمتع بعمل الدوائر الكهربية وبدراسة الإلكترونيات – يمكن عشان قريبة من حاسبات – لكن لما قارنت نفسى باللى حواليه فى الإلكترونيات وفى البرمجة لقيتنى أكثر تميزا فى البرمجة، يبقى ده ممكن يكون مؤشر إنى هابقى برضه متميزة على المدى البعيد.

3- إيه مجالات الشغل المتاحة بعد كده للتخصص ده؟ وهل المجالات دى موجودة فى مصر؟ وإيه مدى توفرها؟ وإيه طبيعة الشغل نفسها؟ وهل تناسبنى ولا لأ؟ وإيه مستوى المرتبات؟ ومين الناس اللى هاتعامل معاهم فى الشغل ده، يعنى هاتعامل مع عملاء ولا مع مهندسين ولا مع عمال وصنايعية ولا مع دكاترة جامعة ولا مع طلبة؟ وهل طبيعة الشغل دى تناسبنى كبنت، يعنى مثلا هل فى ورديات أو تأخير أو شغل فى مواقع عمل؟ وهل أصلا أصحاب الأعمال بيقبلوا بنات فى التخصص ده ولا لأ؟ مين المنافسين بتوعى؟

كل الأسئلة دى – وكل ما يتعلق بسوق العمل عموما – محتاج أعرفه قبل مأ أختار على قد ما أقدر. أعرفه منين بقى؟ من ناس شغالين بالفعل فى كلا التخصيين. طيب أجيب الناس دول منين؟ ممكن حد قريبنا وممكن حد معرفة وممكن أدخل على المنتديات والمجموعات البريدية الهندسية مثلا وأسأل وممكن أتابع إعلانات الشغل فى الجرايد وعلى النت وممكن أحضر مؤتمرات ومعارض توظيف. الخلاصة المعلومات كلها متاحة بس اللى بيدور بجد مش اللى بيسمع كلميتن من شخص واحد معرفة وياخدهم أمر مسلم بيه.

4- ايه مكان التخصص ده فى العالم دلوقت – فى العالم مش بس فى بلدى. يعنى هل بقى خلاص مجال قتل بحثا ولا العالم كله دلوقت بيتكلم عنه ولا هو التخصص اللى جاى فى المستقبل. لأن ممكن تجيلى فرصة للسفر بره. يعنى زى ما بيقولوا علم الميكانيكا كان هو المسيطر فى وقت من الأوقات وبعدين جت الكهربأء وبعدين الكمبيوتر ودلوقت فى حاجة اسمها النانو التكنولوجى شاغلة كل الناس. مش عارفة إذا كتير ع الناس فى أولى وفى تانية يتابعوا حاجة زى كده بس فى رأبى إن الوعى بالتغيرات اللى بتحصل فى العالم دى ممكن يفرق كتير بين شخص والتانى.

5-  إيه طبيعة الدراسة نفسها فى القسم فى الكلية بتاعتى؟ من حيث كل حاجة بقى. من حيث المواد والدكاترة وإمكانيات القسم وتكاليف الدراسة وكل حاجة.

دول تقريبا العوامل الأساسية فى نظرى. ممكن كمان أى حد يكون عنده عوامل إضافية تهمه. فى رأيى أهم اتنين هما رقم واحد واتنين ويمكن هما اللى بيحسموا الاختيار فى نظرى. لأنى شايفة إن أى حد متميز أكيد فرصته هتلاقيه بسهولة – أيوه هى اللى هتلاقيه غالبا- مهما كانت ظروف سوق العمل. طبعا عشان يكون الإنسان متميز لازم يكون بيحب اللى بيعمله أولا وبيجتهد فيه بما يكفى ثانيا. يمكن يكون حد تانى – الولاد غالبا – العامل الأساسى عندهم هو سوق الشغل لأن ده اللى يفرق معاهم فى الأول وفى الآخر. كمان ظروف القسم مش هتخلينى أدخل تخصص مباحبوش أو أسيب تخصص بأحبه لأن فى الآخر الدراسة بتوجهنى بس مش هى اللى بتعملنى. المفروض إنى أنا اللى أبنى نفسى.

كمان ممكن يكون لوجهة نظر الناس اللى حواليا اللى بأثق فى رأيهم أهمية كبيرة. يعنى م إسلام قالنا مرة إن فى حد قالله إنت هتبقى ممتاز فى الرياضيات وعلى هذا الأساس قرر يدخل هندسة. أحيانا بعض الناس بيكونوا شايفين فينا حاجات إحنا مش شايفنها.

آخر حاجة بقى:

عشان أختار اتصالات ولا حاسبات يبقى أجيب ورقتين ورقة أسميها اتصالات وورقة أسميها حاسبات، وكل ورقة أقسمها نصين نص للمميزات ونص للعيوب، وكل ميزة أو كل عيب هيبقى ليها وزن على حسب أهميتها بالنسبة ليا. وطول ما أنا بأجمع معلومات أسجل فى الورقتين. لما تيجى بقى لحظة الاختيار هتكون الصورة بقت أوضح عندى لحد كبير. وتقريبا بقى عندى اختيار مرجح. أصلى صلاة استخارة واتوكل على الله.

فى مرة تانية بقى هأتكلم عن قسم حاسبات تحديدا بصفتى متخرجة منه وبأدرس فيه.

أتمنى أكون أفدت.

الكارتة (بتشديد التاء)

النهارده عمريكو (عمر ابن أخويا) كان بيصحينى وجايبلى حصان صغير لعبة وبيقولى خدى الحصان روحى بيه الكلية

بعد كده قلت لماما ياريت ينفع أروح الكلية بحصان كانت تبقى حاجة حلوة جدا

وبعدين تخيلت لو الناس كلها بدأت ترجع تستخدم الحصان أو الكارتة (بتشديد التاء) داخل المدن ونوفر استخدام العربيات ما بين المدن وبعضها، يعنى للسفر بس

تخيلوا كده؟

أولا مفيش تلوث مفيش حوادث مريعة وبأعتقد إن أزمة المرور هتخف شوية

كمان هنوفر البنزين فبالتالى بنوفر مصادر طاقة

مفيش ميكانيكى كل شوية ساعتها الأطباء البيطريين هتزيد أهميتهم ويمكن مجموع طب بيطرى يببقى أعلى من طب بشرى 🙂

مأعتقدش إن هنضيع وقت كتير قوى يعنى، بيتهيألى إحنا فعليا بنضيع أوقات كتير خلال اليوم ويمكن المواصلات لوحدها بتاكل ربع يومنا مابين وقوف فى الإشارة وبين زحمة سير وبين وبين … إلخ

على فكرة الموضوع مش هزار أنا باتكلم جد .. ليه لأ؟

محبوس أنا

نعيب زماننا والعيب فينا

محدش فينا مبيشتكيش من حال البلد

محدش فينا مبيقولش البلد دى عمرها ما هيتصلح حالنا

كلنا بنقول إن كل البلاد اتقدمت واحنا محلك سر .. ده المتفائلين

الأكتر بيقولوا إننا مش محلك سر إحنا بننزل لتحت

كلنا بنتخنق من الواسطة ومن الرشاوى ومن المحسوبيات

كلنا بنتخنق من الموظفين لما بنروح نعمل مصلحة وكلنا بنتخنق من الشوارع المش نضيفة

كلنا بنكره الظلم وكلنا بنستنكر الكبر اللى بيصيب أى حد لما مركزه بيعلى

كلنا بنشتم فى عدم الالتزام اللى متوطن فى كل ركن فى البلد

كلنا بنبكى حال التعليم وإن الخريجين بقوا لا يصلحوا لشئ

كلنا بنبكى حال المسلمين المستضعين فى كل مكان فى الأرض

طيب جميل

تعالى بقى نجيب مدير جديد فى المصلحة يخلى الناس كلها تمشى عدل محدش يتأخر محدش يهمل محدش يرتشى محدش يمشى قبل ميعاده

تعالى بقى نعمل دفتر حضور وانصراف وممنوع حد يمضى لحد

تعالى بقى نشتغل المحاضرة 3 ساعات بجد

تعالى نعمل محاضر غش فى الامتحانات للى بيغش

تعالى نجيب واحد يمسك فرن العيش من غير ما يبيع الدقيق أو يدى العيش الحلو لحبايبه وأصحابه

تعالى نجيب ظابط بيرفض الواسطة وبيرفض يعفى حد من الجيش على حساب حد تانى

تعالى نعمل غرامة 10 جنيه على أى حد يرمى ورقة فى الشارع

تعالى نقول كله يربط حزام الأمان فى العربية قبل السواقة

تعالى نقول يلا نلتزم

تفتكر كام واحد هيقبل الوضع ده ومش هيحاربه؟

نعيب زماننا والعيب فينا وما لزماننا عيب سوانا

ونهجو ذا الزمان بغير ذنب ولو نطق الزمان لنا هجانا

وليس الذئب يأكل لحم ذئب ويأكل بعضنا بعضا عيانا