امتى بنغضب؟

بس لما تتمس حقوقنا أو حد يهيننا أو حتى يمس كرامتنا من بعيد .. بس لما حد يعمل حاجة تتعبنا شوية نغضب .. وغضب شديد كمان إذا لزم الأمر

لكن لما يتمس حق من حقوق الآخرين هل بنغضب؟

مباتكلمش عن الحقوق الكبيرة اللى بتطلع فى التليفزيون .. مباتكلمش عن حق الفلسطينيين إنهم يعيشوا

بأتكلم عن حقى فى الطابور .. أو حقى فى معاملة كريمة فى مصلحة الكهرباء .. بأتكلم عن حقى فى سلم متمهد بدل سلم الصحراوى بتاع تسلق الصخور

بأتكلم عن حقى فى عربية سيدات فى المترو ميركبهاش رجالة .. بأتكلم عن حقى فى المستشفى إن الدكتور يسمعنى بجد وإن الممرضة تراعينى بحق

بأتكلم عن حقى فى المدرسة إن المدرس يفهمنى بجد مش تقضية واجب

بأتكلم عن حقى فى الكلية إنى آخد محاضرتى وسكشنى كما يقول الكتاب .. على الأقل كتاب اللايحة

إمتى بقى أغضب؟ بس لما تبقى حقوقى الشخصية تحت التهديد.. غير كده لو غضبت الناس ممكن تقولك وانت مالك؟ ايه اللى مضايقك قوى كده؟

يعنى مثلا لو أنا عندى عربية وعرفت إن الرجالة بتركب عربية السيدات فى المترو وغضبت الناس تقولى وانتى مالك؟ ما انتى عندك عربية

لو أنا واقفة فى الطابور قدام الشباك وشفت واحد بيدخل فى الطابور مش مكانه – بس هو مجاش ناحية حقى فى الطابور – وغضبت هيقولوك وانت مالك وأنا جيت ناحيتك؟

لو أنا فى الكلية وشفت طلبة مش بياخدوا حقهم فى محاضرة أو سكشن وغضبت يقولولك هو إبن أختك فيهم ولا ايه؟

لو فى الأتوبيس شفت واحد بيرمى قشر اللب ع الأرض وغضبت يقولك وانت مالك؟ هو كان الأتوبيس بتاعك؟

على فكرة الغضب اللى بأتكلم عنه هنا مش معناه إنى باروح أتخانق أو أعترض أو حتى أتكلم مع اللى عامل المشكلة أو حتى أشتكيه

الغضب اللى بأتكم عنه هنا مجرد الإحساس بالغضب .. مجرد الإحساس بالمهانة وكأنه حقى اللى اتمس حتى لو مش هأعمل أى حاجة كرد فعل .. برضه تلاقى الناس تقولك وإنت مضايق نفسك ليه كده إنت مالك؟ اعمل اللى عليك وخلاص

وخلاص؟؟؟؟

اللى بأتكلم عنه هنا هو حالة التعجب اللى بتيجى للناس – والأصدقاء منهم – لما يشوفوا حد بيغضب عشان شئ مش بيخصه بشكل مباشر

يعنى القاعدة إن كل واحد فينا يهتم بحاله وخلاص .. ومجرد الإحساس بالضيق عشان شئ خارج دايرة حياتنا الشخصية ده يعتبر أمر عجيب

الرسول عليه الصلاة والسلام ما كان ليغضب لنفسه قط .. ولكنه كان بيغضب لحقوق المسلمين

أنا خدت كده فى المدرسة فى يوم من الأيام .. أو سمعتها فى درس أو خطبة يمكن

يعنى مش من المفترض يكون الغضب لحقوق الآخرين شئ عجيب يعنى

ولا هو زى ما بيقولوا الدين فى الجامع أما الحياة فشأن آخر؟

Advertisements

2 تعليقان

  1. phars_alnmr said,

    فبراير 27, 2009 في 12:57 ص

    دلوقتى الكل منتمى لحزب انا مالى
    ومن اهم اهدافه : 1- المشى جنب الحيط (وتم التحقيق واصبح المشى جوه الحيط )
    2- الجرى على لقمة العيش(سياسة التجويع)(تم التحقيق لحد لما ادهست لقمة العيش)
    3- خوف من الشرطة(الدولة البوليسية)(تم التحقيق وتغير الحال الى الشعب فى خدمة الشرطة)
    كفاية كده
    اللى عاوز اقوله ان لو اهتمانا بحق الغير وانا باتكلم على الحقوق اللى بتطلع فى التليفزيوم وحق الفلسطينيين مش هاضيع حقوقنا والتاريخ يثبت ده

  2. marwayusuf said,

    مارس 3, 2009 في 10:03 م

    لما قلت مش الحقوق اللى بتطلع فى التليفزيون مكنتش أقصد إننا ننساها
    اللى كنت بأقوله إن لو أنا ماهتمتش بالحقوق الصغيرة اللى بأشوفها بتضيع كل يوم
    لوماهتمتش بالناس اللى حواليه جيران وزملاء وحتى اللى ماشيين فى الشارع قدامى
    يبقى اهتمامى بالقضية الفلسطينية ساعتها هيبقى تمثيل
    اللى أقصده إننا بنسخن قوى فى القضايا الكبيرة فى الوقت اللى كلنا مضيعين فيه القضايا الصغيرة بكل سهولة
    اللى أقصده إننا مستغربين قوى إحنا ليه هنا على العالم فى الوقت اللى فيه إحنا هنا على بعض
    وعشان متفهمنيش غلط يا مصطفى أنا مش مع الناس اللى بتقول المصريين أولا ونصلح حالنا وبعدين نشوف غيرنا
    لأ
    أنا بس مقتنعة إن اللى ميقدرش يعمل الصغير مش هيقدر يعمل الكبير
    اللى ميحسش باللى ساكن جنبه مأعتقدش هيقدر يفيد اللى على بعد 500 كيلو
    يعنى إذا شفت واحد سنه فوق السبعين واقف فى الشارع الساعة 7 صباحا فى الشتا عشان يقبض معاش مبيعملش حاجة فى الحياة أصلا وعديت بالمشهد ده من غير ما مزاجى يتعكر على الأقل يبقى فى حاجة غلط
    ولو حصل إنى شفت حاجة غلط بتحصل فى الشغل والحاجة دى خارج حدود سلطاتى ومش هتضرنى فى حاجة بس هى هتضر العملاء مثلا وأنا مش مسئولة عنها ومش هاتحاسب عنها فبالتالى مزعلتش ولا غضبت ولا أى حاجة – طالما أنا باعمل اللى عليا – يبقى غضبى على حال الفلسطينيين فيه حاجة غلط


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: