متعة التدريس

أنا مقتعنة إن كل واحد فى الدنيا اتخلق عشان يقوم بدوره وإن كل ميسر لما خلق له. وبأعتبر نفسى مثال على هذه الحقيقة.

مش عارفة إذا كنت أنا مدرسة كويسة قوى كده وهل أنا فعلا أنا مناسبة للدور ده قوى كده. بس اللى أعرفه إن أسعد أوقاتى بتبقى وأنا بأدرس.

لما حد بيتعلم حاجة جديدة بأحس إن فى لمبة نورت فى مخه خلته يكتشف مناطق جديدة فى مخة مكانش شايفها. تخيل بقى إنك إنت تبقى السبب فى النور ده؟

الجميل بقى إن ده جزء مش كل من التدريس. عيون الطلبة وهما منتظرين يتعلموا حاجة جديدة بيبقى فيها نور .. شرط إنهم ميكونوش لسه صاحيين من النوم أو آخر اليوم وهلكانين 🙂

لما يجيلك طالب يستشيرك فى أمر يخص مستقبله قد إيه بتحس بمسئولية. الإحساس بالمسئولية على قد ما هو متعب على قد ما بيحسس الإنسان إن ليه لازمة.

يا سلام بقى لما تشترك مع الطلبة فى نشاط إضافى فوق الدراسة. حاجة كده باختيارهم الحر مش مجبرين عليها. ده بقى بيبقى قمة الحياة.

ميزة كمان للتدريس إنه بيخليك تحتفظ بشبابك للأبد شرط إنك تفضل قريب من تلاميذك للأبد. متسيبهمش وتقعد فى برجك العاجى.

فى ناس بتعتبر التدريس هم كبير ومتعب قوى. لكن أنا باعتبره أجمل نشاط ممكن يقوم بيه الإنسان فى حياته.

Advertisements

5 تعليقات

  1. abdullah said,

    فبراير 7, 2009 في 2:46 ص

    انا كنت ناوي اعمل مدونة لنفسي اقول فيها كلام قريب من ده
    بس خلاص
    انتي قولتيه
    😀
    شكرا

  2. mohamedafattah said,

    فبراير 8, 2009 في 10:41 م

    حلو جدا الموضوع ده. شكرا على مشاركتك لينا فى نظرتك للتدريس. أنا أمنية حياتي إنى أبقى مدرس كويس. وفعلاً أسعد أوقاتي لما ببقى بأدرس.

    هو صحيح التدريس أجمل حاجة عملتها في حياتي لحد دلوقتي ، بس فعلا هو متعب 🙂 أنا باحتاج أدخل في نقاش ذاتى وتفكير عميق (ومتعب بالرغم إنه ممتع) حوالي أكتر من ضعف الوقت الخاص بالدرس حتى أصل لترتيب جيد للموضوع. ده بس كده من غير ما ابتدى أعمل أي حاجة.

    التدريس عندى مسئولية. باحس لسبب ما إن هى دى أهم حاجه ممكن حد يعملها فى حياته – قصدى إنه يعلم غيره. قد إيه باحس اني عندي إلتزام ومسئولية كبيرة قوي تجاه إلي بدرس ليهم. بأحس إني لازم أديهم المساعدة اللي تخليهم يوصلوا للي مقدرتش أوصل ليه. كنت سمعت (من فاروق الباز تقريبا) إن المدرس الصح بيفرش ويمهد الطريق للطلبة علشان هما يقدر يجروا عليه من غير ما يتكعبلوا. يعني يمهد ليهم الطريق اللي تعب في مشيه علشان هما يجروا عليه ويكملوا من حيث انتهى.

    شكرا على الموضوع. 🙂

  3. marwayusuf said,

    فبراير 9, 2009 في 1:56 ص

    مرة واحدة صاحبتى كنت باحكيلها على الشغل وكده قالتلى وانتى بتتكلمى عن الطلبة بأحسك بتتكلمى عن ولادك. افتكرت ده وانت بتقول يا محمد إنك بتبقى عاوزهم يوصلوا للى مقدرتش إنت توصله.
    فعلا ده بيبقى إحساسى. بأحس إن أعمارهم كلها بتضاف لعمرى. بأحس إن الساعة اللى باعملها تأثيرها ممكن يساوى ساعات كتيـــــــــر. المشكلة بقى تأثيرها حلو ولا وحش؟
    هو ده السؤال المرعب.

  4. Raghda said,

    مارس 5, 2009 في 1:04 ص

    فعلا انا بحس ان التدريس ده من اجمل المهن فى الحياة و خصوصا لو اقترن برسالة،،

    يعنى انا دايما بفتكر المعيدين و الدكاترة الكويسين فى الجامعة و بدعيلهم على كل الحاجات

    اللى علموهلنا سواء فى الدنيا او فى المواد الدراسية

    و بعد ما اتخرجت و اشتغلت و عدى سنتين تقريبا على خروجى من الجامعة ،، فى مواقف بفتكر

    فيها الناس دى و بفتكر طريقة تفكيرهم و اسلوبهم معانا

    يعنى مثلا واحد زى د. علاء ،، هو واحد من الناس المحترمة اوى اوى اللى الواحد شافها

    كان دايما بيجيلى احساس و هو بيدرسلنا ان احنا كلنا فريق واحد ،، مش هو بقى الدكتور و

    الطلبة الغلابة،

    يعنى كان ليه اسلوب بسيط كده و متواضع يخليك تحترمه اوى اوى

    و ده اللى انا شايفاه فى زمايلى اللى اتعينوا السنة دى ،، انهم ان شاء الله كام سنة و

    هيبقوا دكاترة من اللى طلبة بتدعيلهم طول حياتهم

  5. ندى عبد الغني said,

    مارس 30, 2009 في 11:36 م

    مروتي المدونة و كلامك جميل بجد,وبالنسبة لموضوع التدريس دا ففعلاً أنا رأيي إن مهنة التدريس دي أفضل مهنة في الدنيا,لو مكنتش إشتغلت في مجال الهندسة كنت إشتغلت مدرسة بس للاطفال حضانة بقى أو إبتدائيD:, شوفي كل ما تعلمي حد حاجة جديدة ومفيدة وإنك تأثري بطريقة إيجابية في حياة غيرك دا اد ايه إحساس جميل وثوابه كبير,بس طبعاً مش أي حد يقدر يدرس وعنده الموهبة والقدرة على تحمل المسئولية…بس إنتي قدها وقدود ومنتظرة أشوف هندسة شبرا جديدة على إيد مروة يوسف 🙂 .


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: